Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə İraqın Azərbaycandakı Fövqəladə və Səlahiyyətli səfiri Məkki Əl Məmurini fəaliyyətinin başa çatması münasibətilə qəbul edib.
Azərbaycan və İraq arasında siyasi və tarixi dini-mənəvi əlaqələrin inkişafının vacibliyinə toxunan Şeyxülislam A. Paşazadə səfir Məmurinin bu işə verdiyi töhfələrdən məmnunluqla danışıb. Qeyd edib ki, ölkələrimiz, xalqlarımız arasında tarixi, ənənəvi mədəni-mənəvi, doğma münasibətlərin qorunub saxlanılması, inkişaf etdirilməsi olduqca mühüm əhəmiyyət kəsb edir.
İraqlı diplomat, öz növbəsində, Qafqaz müsəlmanlarının möhtərəm din xadimi olan Şeyxülislam A. Paşazadənin Azərbaycan-İraq dini-mənəvi əlaqələrinin dərinləşməsi istiqamətində fəaliyyətindən və Şeyxülislam tərəfindən səfir olaraq səylərinə verilən dəstəkdən minnətdarlıqla bəhs etdi. Azərbaycanın Vətən müharibəsində qazandığı Zəfərdən sonra azad olunmuş Qarabağ torpaqlarına etdiyi səfərlərdən zəngin təəssüratlarını bölüşən səfir Azərbaycan xalqının uğurlarından qürur duyduğunu ifadə edib. İraq Prezidentinin son illər ərzində üç dəfə Azərbaycana səfər etməsinin ölkələrimiz arasında münasibətlərin yüksək səviyyəsinə dəlalət etdiyini vurğulayan səfir bunun bütün sahələrdə səmərəli əlaqələrin daha da inkişafına töhfə verdiyini qeyd edib.
Şeyxülislam A. Paşazadə cənab M. Məmurinin xalqlarımız, dövlətlərimiz arasında mövcud körpülərin daha da möhkəmləndirilməsi üçün göstərdiyi səylərini yüksək qiymətləndirib, ona qarşıdakı fəaliyyətində uğurlar dilədi.
QMİ-nin Mətbuat Xidməti
*Materiallardan istifadə zamanı sayta istinad vacibdir!